Son illər şagirdlərin dərs yükünün artması paralel olaraq onların məktəbli çantalarının ağırlaşmasına səbəb olur. Valideynlərin əksəriyyəti bu məsələdən narazıdırlar. Sözügedən problem mediada müəyyən vaxtlarda işıqlandırılsa da, həlli istiqamətində kəsərli addım atılmır.

Əməkdar elm xadimi, professor Şahlar Əsgərov mövzu ilə bağlı düşüncələrini Bizim.Media ilə bölüşüb.

O qeyd edib ki, problemi həll etmək üçün sadəcə məntiq lazımdır:

“Məsələn, minik maşını dörd nəfər üçün nəzərdə tutulub. Həmin avtomobilə əlavə iki nəfərin oturması nəqliyyat vasitəsindəki şəxslərin əziyyətinə səbəb olur.

İnsan da belədir. Hər bir şagirdin yükgötürmə qabiliyyəti var. Həmin çəkidən artıq yükü şagirdə vermək ona əziyyətdir. Proqram elə tutulmalıdır ki, şagirdlər əziyyət çəkməsinlər. Şagirdlərin uşaqlıq etməyə, oynamağa vaxtı qalmalıdır.

Aidiyyəti qurumlar uşaqların belinə yükü yığmaqla onları məhv edirlər.

Təhsil prosesinin əsaslandığı elmlər pedaqogika və psixologiyadır. Azərbaycanda bu elmlər təmsil olunmur. Məktəblərin taleyi hüquqşünasların, maliyyəçilərin, iqtisadçıların əlində qalıb. Onlar da prosesi bilmirlər. Uşaqları artıq yükləməklə öyrənməkləri üçün yox, öyrənməməkləri üçün çalışırlar”.