22 may 2024-cü il tarixində iqtisadiyyat naziri Mikayıl Cabbarov Gürcüstanın "Georgian Beer Company LLC" şirkətinin nümayəndələri Sezar Çöçelli, Şalva Çöçelli və Qoça Darçiaşvili ilə görüşüb, ikitərəfli əməkdaşlığın inkişaf perspektivləri barədə müzakirələr aparılıb.

seher.media xəbər verir ki, görüş çərçivəsində "Azərbaycan İnvestisiya Şirkəti" ASC və Gürcüstanın "Georgian Beer Company Ltd" şirkətinin təsisçisi arasında Qəbələ rayonunda qabaqcıl beynəlxalq texnologiyalara əsaslanan lisenziyalı premium pivə markalarının, yerli brend pivəsinin və sərinləşdirici içkilərin istehsalı üzrə yeni zavodunun qurulmasına dair Birgə İştirak Müqaviləsi imzalanıb.

Rəqabətqabiliyyətli məhsul istehsalı ilə ixrac imkanlarının genişləndirilməsinə xidmət edəcək zavodda illik 140 milyon litr istehsal gücünün və 300-ə yaxın yeni iş yerinin yaradılması nəzərdə tutulur.