2020-ci il Vətən müharibəsi Zəfər tarixi ilə bizlərə məğrurluq, fəxr hissi yaşatsa da, hafizəmizdə qaysaq bağlamayan yara izləri də buraxdı.

Bu tarixin şanlı zəfərinə imza atan cənab İlham Əliyevin “Dəmir Yumruq”u ətrafında toplaşan vətənpərvər oğullarımız hər biri bir igidlik, şücaət göstərərək vətənin hər qayasına, hər qarış torpağına qanından bir damla verdi, canından keçdi. Özlərini vətənə qurban edən, bizim bu gün azad və firavan bir ölkədə yaşamamız üçün canlarını fəda edən igid oğullarımızdan biri də Rauf Məhərrəm oğlu İbadovdur. O Rauf ki, hələ müharibə başlamamışdan öncə də, çəkdiyi rəsm əsərlərində vətənə, onun qəhrəmanlarına olan bağlılığı əks olunurdu.

2020-ci il sentyabr ayında başlayan Vətən müharibəsinə könüllü olaraq yollanan Raufdan geriyə indi yalnız xoş xatirələr qalıb. Bu gün şəhidin anım günündə onun ziyarətinə gələn ziyalılar, media mənsubları, bir çox şəhid ailələri, məktəblilər və Abşeron rayon icra başçısı Abdin Fərzəliyev cənabları Raufun ailəsinə baş sağlığı verərək, səbr diləyib və şəhidin xatirəsini yad ediblər.

“SəhərMedia” adından Şəhid İbadov Raufun atası Məhərrəm kişinin timsalında bütün şəhid ailələrinə səbr, şəhidlərimizə isə Allahdan rəhmət diləyirik.