"Rusiya Azərbaycanın Qarabağ ermənilərinin reinteqrasiyası planı ilə tanışdır".

"Report"un məlumatına görə, bunu Rusiya Xarici İşlər Nazirliyinin (XİN) rəsmi nümayəndəsi Mariya Zaxarova Qarabağı könüllü olaraq tərk etmiş ermənilərin geri qaytarılması məsələsini şərh edərkən deyib.

Üstəlik, o, təklif edib ki, bu əhalini təkcə erməni jurnalistin "əzəli" sözü ifadə etməyə çalışdığı kimi deyil, başqa cür də adlandırmaq olar, o cümlədən "son vaxtlara qədər orada yaşayanlar".

Zaxarova vurğulayıb ki, Rusiya Azərbaycan, Ermənistan və Rusiyanın 2020-ci ildə və sonra əldə etdiyi üçtərəfli razılaşmalardan çıxış edir. Onun sözlərinə görə, bu razılaşma hələ də Azərbaycan-Ermənistan barışığının əsasını təşkil edir:

"Biz hesab edirik ki, bunun alternativi yoxdur".

XİN nümayəndəsi qeyd edib ki, üçtərəfli saziş Bakı ilə İrəvan arasında münasibətlərin normallaşdırılması üçün bütün əsas yolları, o cümlədən sülh müqaviləsinin inkişafı, sərhədin delimitasiyası, demarkasiyası, regionda nəqliyyat kommunikasiyalarının açılması və vətəndaş cəmiyyəti vasitəsilə əlaqələrin inkişafını əhatə edir.

O, həmçinin vurğulayıb ki, Rusiya prezidentinin Azərbaycana son dövlət səfəri zamanı Ermənistan-Azərbaycan münasibətlərinin normallaşması ətraflı müzakirə olunub.